Bli med på eit nasjonalt løft for fysikken i Verdas fysikkår 2005!

UNESCO har vedtatt at 2005 skal vere Verdas Fysikkår, og planleggjinga av fysikkåret i Noreg er allereie i gong. I 2002 ga Utdannings- og forskningsdepartementet ut strategiplanen "Realfag, naturligvis -strategi for styrking av realfagene 2002-2007". Planen vart oppdatert i januar 2004, og her er Fysikkåret 2005 lista opp som eit av tiltaka for å "heve fysikkfagets status i samfunnet og stimulere barn og unges interesse for fysikk" (sitat frå side 33, punkt 5D.5).

Norsk fysisk selskap har nedsett ein nasjonal komité ("Fysikkår-komitéen") som skal iverksette og koordinere tiltak i samband med fysikkåret. Fysikkår-komitéen vil gjere mest mogleg ut av dette året for å få publikum nysgjerrig på fysiske fenomen rundt seg, profilere fysikk som eit praktisk og eksperimentelt fag samt å bruke materiale som appellerer like mykje til jenter som til gutar. Me ynskjer å bruke 2005 til å fokusere på korleis fysikken formar kvardagen vår såvel som måten me oppfattar verda rundt oss på. Målet er å nå ut til alle lag av folket, gjerne gjennom utradisjonelle kanalar. Barn og ungdom i skulen vil sjølvsagt vere ei viktig målgruppe.

I løpet av 2005 ser me for oss å arrangere ei nasjonal fysikkveke i skulen og i lokalmiljøa. Her kan fleire aktivitetar knyttast til fysikk-temaet:

• Fysikklærarar og eldre elevar (til dømes 2FY- og 3FY-elevar) held foredrag og demonstrasjonar for yngre elevar (førsteklassingar i vgs. samt elevar i grunnskulen)
• Klassar på alle trinn vitjar ei lokal teknologibedrift og får omvisning (kanskje klassen kan gjere research om bedrifta/teknologien som prosjekt på førehand?)
• Eige prosjektarbeid i 10.klasse, der ein fordjupar seg i fysikkdelen av pensum og bruker eksterne kjelder og internett i arbeidet. Her vil Fysikkår-komitéen bidra med materiale og ressursar
• Fysikkelevane i den vidaregåande skulen gjennomfører eit forskingsretta prosjektarbeid. Elevane vert oppfordra til å sende inn prosjekta sine til Konkurransen Unge Forskere, som i samband med Fysikkåret vil sette opp ein eigen pris for beste fysikkoppgåve. I samarbeid med Stiftelsen Ungdom og Forskning vert det sendt ut eit vegleiingshefte for forskingsretta prosjektarbeid i fysikk, til alle vidaregåande skular i landet.
• Alle elevar på grunnkurset, allmennfagleg studieretning i vgs. får utdelt eit fysikkhefte med mellom anna små forsøk ("fysikktriks"), presentasjonar av fysikk som fag og kva ein kan arbeide med som fysikar
• I 2005 feirar relativitetsteorien og oppdaginga av den fotoelektriske effekt 100 år. Samstundes feirar me i Noreg 100 års-jubileum for stiftinga av Norsk Hydro og Kristian Birkeland sine bidrag til industrieventyret. Desse jubilea kan danne grunnlag for prosjektoppgåver for fysikkelevar i den vidaregåande skulen.
• Foredrag fra fysikklærarar eller andre fysikarar i samband med organisasjonar/fritidsaktivitetar. Døme er foredrag om lyd og lydbølger på korpsøvinga, prosjekt om nordlys i Speidaren
• Samarbeid med foreldre om aktivitetar på kveldstid knytt til grunnskular; her kan fysikarar frå skulemiljøet eller teknologar blant foreldra halde demonstrasjonar og foredrag
• Samarbeid med lørdagsuniversitet, pensjonistforeningar m.m.
• Samarbeid med lokale vitensentra og museum om spesielle tilbod i fysikkveka

Me vil svært gjerne ha fleire idear og tilbakemeldingar på kva for aktivitetar og tiltak som lar seg gjennomføre i undervisningssamanheng eller gjennom organiserte fritidstilbod i løpet av ei nasjonal fysikkveke. Utover i planleggjingsåret 2004 kjem Fysikkår-komitéen til å utarbeide materiell som kan brukast i dei ulike aktivitetane. Fysikkår-komitéen tar mål av seg til å sende ut ei "inspirasjonspakke" til fysikklærarar, fysikkmiljø og moglege samarbeidspartnarar i god tid før den nasjonale veka. Pakka vil innehalde meir detaljerte forslag til aktivitetar, bakgrunnsmateriell og så vidare. Konkret ynskjer me tilbakemelding på:

• Når på året ei nasjonal fysikkveke bør arrangerast. Eit forslag er å leggje fysikkveka til 6. -13.november; eit stykke ut i skuleåret, ikkje for tidleg etter Forskingsdagane i september og før elevane veljer fag i vidaregåande skule. Eit anna forslag er veka 14.-18.mars; Albert Einstein vart fødd 14.mars og Fysikkåret 2005 feirar hundreårsjubiléet for dei største teoriane hans.
• Type materiell de ynskjer at Fysikkår-komitéen skal utarbeide
• Fleire forslag til tiltak i fysikkveka
• Kva for tiltak du meiner er realistisk å gjennomføre på din skule eller i ditt lokalmiljø

Kom med innspel innan 1. juni 2004 på skjema via webadressa http://wo.uio.no/as/WebObjects/nettskjema.woa/wa/svar?id=4706

Eventuelle spørsmål kan rettast til Magnhild Sægrov på e-post: magnhs@fys.uio.no

For Fysikkår-komitéen 2005:

Anders Isnes, Nasjonalt senter for naturfag i opplæringen
Ellen K. Henriksen, Skolelaboratoriet, Fysisk institutt, UiO
Magnhild Sægrov,  Førstekonsulent, Fysisk institutt, UiO